Да се раскаже приказна во приказната – Критички осврт кон романот Кобајаши Мару од поетесата Гордана Каракашевска

Анде Јанков напишал одличен роман. Иако станува збор за четврти дел од серијалот за инспекторот Виктор Николов, Кобајаши Мару може да го читате и ако претходно не сте ги прочитале останатите три дела, како што беше во мојот случај.

Концептот на приказната е брилијантен. Мене ме освои уште на втората страница. Што е тоа Кобајаши мару? Што им е заедничко на еден жолт мачор, двајца браќа, пресметано убиство, Платон и војната во Украина? Што е тоа Алегорија на пештерата и која е приказната внатре во приказната?

Читајќи ја книгата ќе се најдете во вртлогот на чудесниот и фантастичен свет на авторот, ќе уживате во чудесно извајани ликови кои се наоѓаат во ситуации кои ја одразуваат суровата реалност која е производ на крвавата политика. Неговите јунаци се соочуваат со секојдневните предизвици на суровата реалност во која сите ние живееме: скапотијата, задолженоста, корупцијата, неправдата, манипулациите, нечесноста и борбата за опстанок.

Дејството е сместено во Скопје, а интертекстуалните вкрстувања со важни книжевни дела и настани од светската историја (војната во Украина), создаваат впечаток за реална фикција. Затоа, неговиот роман може да се нарече политички трилер.

Иако дејствието на романот се случува само во неколку дена, авторот успешно не води низ две приказни, две реалности, два света, двајца браќа – Виктор (инспектор) и Даниел (писател). Ликот на инспекторот Виктор Николов е успешно изграден, додека ликот на неговиот брат – Даниел – писател, верувам дека на некои читатели ќе им биде многу интересен од причина што тој лик е Алтер его на авторот. Тој лик е совршено претставен затоа што секој најдобро си се познава себеси. Така, преку ликот на писателот, читателот се запознава со самиот автор, што сака, а што не сака, каква музика слуша, како размислува, и најважно – што сака да чита.

Без некои реченици, романот би го имал истиот ефект. Значи, доколку биле исфрлени, романот секако дека би ја постигнал истата цел, истиот успех. Едно е сигурно, Анде Јанков со овој роман покажува дека може да застане рамо до рамо со етаблирани автори. За романот се зборува, веќе почна да ниже награди, а на нас ни останува да му посакаме светла иднина.

Гордана Каракашевска
Поетеса